LAOAG CITY – Inadmitir ni Mayor Edmar Vincent Bonoan iti ili ti San Nicolas a nadismaya daytoy kalpasan a naiwayatan ti Search Operation ti maysa kadagiti staff-na.
Inbatadna a saanna nga inpagarup ti napasamak ti nasao nga staff-na gapu ta nasayaat ken napintas ti panagtrabahona iti lokal a gobierno.
Inlawlawagna a ti maseknan nga staff-na ket dati a nagserbi iti babaen ti administrasion ni dati a Mayor Domingo Ambrocio ken dati a Mayor Mike Hernando.
Mainaig iti daytoy, inpakaammo ni Mayor Bonoan a kabayatan ti panagsalsaludsodna kadagiti dadduma nga empleado ket rumrummuar a mannakikooperar met ti nasao nga staff-na kadagiti nagduduma a maipatpatungpal a programa ti munisipio.
Kunana a drug surrenderee ti nasao nga staff-na ken nagnegatibo ti resulta ti drug test daytoy.
Innayonna a saanna a kayat a ma-discriminate ti asinoman nga empleado wenno dagiti adda iti babaenna gapu ta naminsan a naiyaw-awan ti dana.
