LAOAG CITY – Inrekomendar ti forensic pathologist a ni Dr. Raquel Fortun ti pannakaipadalan nga umuna iti x-ray iti tunggal sako a narekobre iti Taal Lake a mapapati a naglaon dagiti tultulang sakbay a malukatan.
Inbatadna a no isuna ti masurot ket nasaysayaat a maipadalan dagitoy iti x-ray gapu ta ti tunggal pedaso dagiti narekobre a banag ket napateg para iti agbalin a resulta ti panangtingiting.
Kunana a mabalin nga adda ti masarakan ditoy a bala ti paltog ken dadduma pay a banag.
Nupay kasta, inlawlawag ti beterano a forensic pathologist nga awan ti pakainaiganna iti maiwaywayat a laboratory test kadagiti nagian iti naiyaon a sako.
Immunan a kinumpirmaran ni National Bureau of Investigation Director Jaime Santiago a ti team ti ahensia ti mangiwayat ti panangtingiting kadagiti narekobre a tultulang.
Kabayatanna, kuna ni Dr. Fortun a no maipadalan dagitoy iti naiget a forensic investigation usar ti maiyannatop a forensic science, mabalin pay a mabigbig ken maduktalan no asino ti akin-tulang dagiti narekobre.
Maipalagip nga inbutaktak ni Julie Patidongan wenno alyas “Totoy” a naibelleng dagiti bangkay dagiti mapukpukaw a mammallot iti Taal Lake.
