LAOAG CITY – Naglikudan ni Commission on Elections Chairman George Garcia ti alegasyon a ti certified ken audited software program ti automated counting machines a nausar iti 2025 midterm elections ket nasukatan manipod iti version 3.4.0 ket napagbalin a version 3.5.0.
Inaramid daytoy ni Garcia kalpasan a nagpila ti reklamo dagiti sumagmamano nga obispo, retired generals ken civil society leaders iti National Bureau of Investigation (NBI) kontra kenkuana ken dadduma pay nga opisyal ti ahensya.
Inpetteng dagiti complainants nga illegal ti inaramid ti Commission on Elections a sukatan ti certified ken audited software program version, ken adda pay ti alegasyon a panangdalos wenno panang-depete ti agarop 5 a milyon a botos iti vote discrepancy a ti laeng Commission on Elections ti nangaramid nga awan ti presensya wenno partisipasyon ti siasinno man manipod iti 5 transparency groups.
Inpetteng ni Garcia a ti laeng Automated Counting Machines nga addaan ti “updated” ti software version 3.5.0 ti nausar iti napalabas nga eleksyon ken mapaneknekan daytoy ti Parish Pastoral Council for Responsible Voting.
