LAOAG CITY – Mangipaay ti P14 million a balor ti tulong ti gobierno ti United States para kadagiti biktima ken naapektaran ti nalawa a panaglayos iti Luzon.
Daytoy ket gapu iti nagsasaruno a bagyo a dimmuprak ditoy pagilian a pinapigsa pay ti abagat.
Inbatad ni United States Ambassador to the Philippines MaryKay Carlson, mangilatang ti gobierno ti Estados Unidos ti 250,000 US dollars wenno katukad ti P13.8 million a pundo para iti United Nations World Food Programme (WFP).
Daytoy ket para iti panangibiahe kadagiti taraon kadagiti lugar a naapektaran iti Metro Manila, Northern ken Central Luzon pakairamanan ti CALABARZON.
Maiyalokar ti nasao a pundo iti babaen ti United States Department of States’ Bureau of Population, Refugees, and Migration a mausar tapno suportaran ti government relief operation.
Kabayatanna, manarimaan ti pannakikoordinar ti gobierno ti Estados Unidos iti gobierno ti Pilipinas tapno masigurado a makadanon ti tulongda kadagiti agkasapulan.
