LAOAG CITY – Agtultuloy ti southwest monsoon wenno “habagat” a mangitunda iti panagtudo iti dakkel a paset ti Northern ken Central Luzon.
Basar iti Philippine Atmospheric, Geophysical and Astronomical Services Administration (PAGASA), uray kumapoy ti habagat iti sumarsaruno nga aldaw ket mabalin pay laeng a makapasar ti panagtudo iti nagduduma a lugar ditoy pagilian.
Manamnama iti sagpaminsan a panagtudo iti lugar ti Ilocos Norte ken Ilocos Sur a mabalin a mangitunda ti 50 agingga 100 millimeters a nagballaag ti state weather bureau a posible daytoy a mangitunda ti flash floods ken landslides aglalo kadagiti kabanbantayan ken nabababa a lugar.
Iti baet daytoy, manamnama pay ti naulep a tangatang nga addaan ti panagtudona ken panaggurruod ti lugar ti Metro Manila, Cordillera Administrartive Region, Pampanga, Bataan, Tarlac, Bulacan, Rizal, Cavite, Batangas ken iti nagduduma a paset ti Ilocos Norte.
Nagpallagip ti Philippine Atmospheric, Geophysical and Astronomical Services Administration ti publiko nga agtalinaed nga alerto gapu ta uray kumapkapoy ti habagat ket mabalin pay laeng daytoy a mangitunda ti panaglayos aglalo kadagiti narisgo a lugar kabayatan iti mapaspasaran a napigsa a panaggurruod.
