LAOAG CITY – Napan timmulong ti Ilocos Norte Electric Cooperative nga idadaulwan ni acting General Manager Perry Martinez iti Pangasinan Electric Cooperative wennu PANELCO 1 tapnu maisubli dagiti linya ti kuryente a nadadael gapu iti bagyo Emong.
Daytoy ket wagas ti kooperatiba tapnu agyaman iti namarsua iti saan unay a pannakaapektar ti probinsia iti iduduprak ti bagyo.
Base ti Ilocos Norte Electric Cooperative, Hulyo 25 idi tinawagan ni Acting General Manager Martinez ni General Manager Jojo Segundera iti Panelco 1 tapnu ipakaammo daytoy nga inisyatibo na kas panangipakita ti pannakikaysada iti pada da a kooperatiba.
Naamoan a 7 a lineman dagiti inpatulod ti acting general manager tapnu tumulong a mangisubli dagiti electric poles ken linya a sakupen ti Alaminos City ken 8 pay a municipalidad iti probinsya ti Pangasinan.
Mainaig iti daytoy, nagyaman ni Segundera kenni Acting General Manager Martinez gapu ta uray dinuprak met ti bagyo Emong ditoy probinsia ket saan a nagdudua a nangipaay ti tulong kadakuada.
