LAOAG CITY – Naiget a mapawilan ti naruay a residente iti asideg ti kabaybayan iti Hawaii idiay Estados Unidos nga agsublida kadagiti pagtaenganda kabayatan nga adda iti babaen ti tsunami warning iti nasao a lugar.
Daytoy ket kalpasan iti idadayyeg ti magnitude 8.8 a gingined iti akin-daya a kabaybayan ti Kamchatka idiay Russia.
Segun ken ni Bombo International News Correspondent Manny Pascua manipud iti isla ti Hawaii idiay Estados Unidos, sipsiputan dagiti otoridad iti kabaybayan iti paset ti Hilo Bay ken Honolulu iti posible a panagdakkel ti dalluyong.
Inbatadna nga adda dagiti pulis iti Hawaii Police Department a nagturong kadagiti kabaybayan tapno maballaagan dagiti tattao a tumalaw dagitoy.
Inlawlawagna nga adda dagiti sumagmamano a kalsada nga agturong kadagiti baybay ti temporario a sinerraan dagiti otoridad gapu ta saan a maipalubos nga adda ti mapan agpasiar wenno agdidigus.
Kunana nga adda dagiti residente iti asideg ti baybay ti timmalaw ken immadayo pay laeng gapu iti amak ken buteng dagitoy no bilang adda ti mapasamak a tsunami.
Innayonna nga agtultuloy ti panangmonitor dagiti otoridad kadagiti coastal areas tapno maipasigurado nga awan ti nagbati a residente kadagiti pagtaenganda.
