LAOAG CITY – Nangipaay ti tulong ni Vice Mayor Rey Carlos Fariñas kadagiti pamilia a naapektaran iti idadalapos ti alipogpog iti Barangay Caaoacan ditoy siudad ti Laoag.
Inbatadna nga apaman a naawatda ti damag ket insigida a nagtignay ti grupona tapno mangipadanon ti tulong kadagiti biktima.
Inlawlawagna a basar iti pannakisarsaritana kadagiti residente ket adda ti 13 a pamilia ti naitayab ti galbada, nadadael ti pagtaenganda ken naperdi dagiti sumagmamano a kagamitanda.
Mainaig iti daytoy, inpakaammo ni Dr. Melvin Manuel, mangidadaulo ti City Disaster Risk Reduction and Management Office a basar iti assessment nga inwayat ti Department of Social Welfare and Development ket adda ti nairekordda a pito a pamilia ti naapektaran iti idadalapos ti alipogpog.
Kunana nga adda ti uppat a pagtaengan ti nadadael no sadinno a tallo kadagitoy ket partially damaged idinto a maysa ti totally damaged.
Innayonna nga idi laeng kalman ket nangipaayen ti Department of Social Welfare and Development ti family food packs manipud iti national government ken nangipaay met ti materiales ti Laoag City government a mausarda iti pannakatarimaan kadagiti nadadael a paset ti pagtaenganda.
