LAOAG CITY – Manamnama a maipaayan ti “resolution of commendation” dagiti kameng ti Ilocos Norte Girls Softball team a first runner-up iti West Zone Girls Softball World Series idiay Hemet, California, United States of America.
Segun ken ni Atty. Saul Lazo, Chairman ti Committee on Education ti Sangguniang Panlalawigan, rumbeng laeng a maipaayanda iti nasao a pammigbig tapno adda ti agbalin a rekord ti Sangguniang Panlalawigan kadagiti napipintas a magapgapoanan dagiti kakailian.
Inbatadna a planona nga idasar ti nasao a resolusion iti masungad a regular session dagitoy.
Inpatalgedna nga agtultuloy ti panangipapaay ti Provincial Government of Ilocos Norte ti suporta kadagiti agtutubo ditoy probinsia.
Kabayatanna, inpakaammona a malaksid iti nasao a pammadayaw manipud iti Sangguniang Panlalawigan ket adda pay ti maipapaay nga insentibo kadagiti makagungun-od ti pammadayaw manipud kadagiti kompetision iti sabali a pagilian kas iti nasao a Girls Softball Team ti probinsia.
Kunana a nailanad iti “integrated scholarship program” ti gunguna a maipaay kadagitoy.
Innayonna a daytoy ket sabali laeng iti gunguna a maipaay kadakuada iti Sirib Awards a maipapaay kadagiti amin a kakailian a makaipaay ti pakaidaydayawan ti Ilocos Norte iti man benneg ti national wenno international.
Naammoan a nag-courtesy call ti nasao a team ken ni Gov. Cecilia Araneta Marcos iti immun-una a gundaway.
