LAOAG CITY – Nasentensiaan ti 12 a tawen nga house arrest ti dati a Presidente idiay Colombia a ni Álvaro Uribe gapu iti pannakibibiang ken pananglukona.
Ti agtawen ti 73 ket maibilang a kaunaan a dati a Presidente iti pakasaritaan ti nasao a pagilian a nakumbiktaran ti krimen.
Napawilan isuna a makapagserbi iti public office ken namulta ti $578,000.
Mainaig iti daytoy, kinasarita ni Uribe ti maysa nga huwes iti Bogotá nga agapela daytoy para iti pannakakunbiktarna.
Nagserbi isuna kas Presidente idi tawen 2002 agingga iti 2010 ken nagtalinaed a nalatak idiay Colombia a naakusaran iti pannakikammayetna iti paramilitar tapno maparmek dagiti rebelde a grupo banag a naglikudanna.
Naammoan nga adda ti dua a naibalud a dati a paramilitar ti nangted ti ebidensia a kunkunada a ti dati nga abugado ni Uribe a ni Diego Cadena ti nangidiaya kadakuada ti kuarta tapno agtestigoda a pabor ken ni Uribe.
Kabayatanna, naiget a naglikudan ni Cadena dagiti pammabasol ken nagtestigo kaduana ti sumagmamano a dadduma pay a dati a paramilitar iti biang ni Uribe.
