LAOAG CITY – Ipangpangruna nga imbestigaran ti Senate Blue Ribbon Committee mainaig kadagiti flood control projects a naiget a binabalaw ni Presidente Ferdinand Marcos Jr. kabayatan ti State of the Nation Address wenno SONA-na.
Inbatad ni Senate President pro-tempore Jinggoy Estrada, nangngegna a mangisayangkat ti motu proprio investigation mainaig kadagiti flood control projects ni Blue Ribbon Committee Chairman Rodante Marcoleta.
Mamati ni Estrada a makatulong pay iti imbestigasion ni Marcoleta a dati a kongresista gapu ta posible nga am-ammona dagiti maitudtudo a Congressman a kontraktor.
Naammoan a dagiti tingitingen pay ti nabileg a komite ti problema iti joint venture agreements dagiti water districts ken dagiti water concessionaires.
Inpasingked ni Estrada a saan nga agbalin a sakit ti ulo ti Marcos administration ni Marcoleta ken agbalin a patas kadagiti iwayat nga imbestigasion ti komite.
