LAOAG CITY – Inbatad ni Mayor Virgilio Calajate nga ad-adda pay a pasayaaten ken papintasen da ti food court iti ili ti Badoc a saan pay a naus-usar sipud naipasdek idi 2023.
Malaksid iti panangpapintas da ket mabaliwan pay ti nagan na iti Agri-tourism gapu ta saan laeng a makan ti mailako no di ket nagduduma a produkto.
Maipalagip a saan pay a pulos a nausar ti food court gapu ta malaksid nga awan ti kuryente ken danom na ket nangina pay ti pagrenta dagiti mangayat a mangala ti pwesto na.
Gapu iti daytoy, kuna ti mayor nga ipababa da ti renta manipod 4,500 a pisos ket agbalin a 3 ribo a pisos.
Innayon na a mabalinen ti ag-inquire dagiti mangayat nga agrenta no sadinno a nawaya ti siasinno man ti mangala iti pwesto na iti nasao a pasdek ngem ti ad-adda nga iprayoridad da ket dagiti metlaeng residente iti ili ti Badoc.
