LAOAG CITY – Balligi a naisayangkat ti Inter-hospital Photography Exhibit ti Mariano Marcos Memorial Hospital and Medical Center iti maysa a dakkel a mall iti ili ti San Nicolas.
Segun ken ni Dr. Jose Orosa III, Chief of Medical Professional Staff iti nasao nga ospital, gagem ti nasao a programa ket tapno mainspiraran dagiti agserserbi kas healthcare workers ken ti komunidad.
Inbatadna a babaen iti daytoy ket ad-adda a maitandudo dagiti frontline workers ti kinapateg iti aglawlaw ken pannakaital-o ti pannakatagiben ti salun-at.
Inlawlawagna a nasayaat pay a maammoan dagit umili ti pannakaawat dagitoy iti healthcare system.
Kunana a naiget a magutgutigot dagiti indibidual wenno grupo iti pannakipagpaset iti pananglaban kadagiti problema iti aglawlaw tapno masalakniban ti salun-at.
Naammoan a ni Dr. Rickson Balalio, mangidadaulo ti Provincial Health Office ti nagbalin a kangrunaan a sangaili iti nasao a programa.
Innayonna a ti tema ita a tawen ket napauloan iti “Carbon Conscious Care: A Visual Journey to a Greener Future “ kagiddan iti pannakaselebrar ti National Hospital Week 2025.
Kabayatanna, inpaayan ti Mariano Marcos Memorial Hospital and Medical Center ti plaque of recognition ti Bombo Radyo Laoag iti pannakibinnuligna iti pannakaisayangkat ti radio program competition no sadinno a dagiti nangabak a piyesa ket maipatangatang iti programa a Doctor Bombo.
