LAOAG CITY – Umad-adu ti kaso ti dengue ditoy probinsia.
Daytoy ti inpakaammo ni Dr. Rickson Balalio, mangidadaulo ti Provincial Health Office.
Segun kenkuana, sipod idi bulan ti Enero kadaytoy a tawen ket agtultuloy iti panagngato ti kaso ti dengue rason nga ad-adda pay a papaigetanda ti kampania kontra iti nasao a virus.
Inbatadna a dumanonen iti 310 ti kaso ti dengue, 120 manipud iti primero distrito ken 190 manipud met iti segundo distrito.
Iti primero distrito, ditoy siudad ti Laoag ti kaaduan nga addan iti 45 kaso ti dengue, sarunoen iti ili ti Piddig nga addan ti 17 a kaso, agpada a nairekord iti ili ti Bacara ken Sarrat ti 11 a bilang dagiti nagpositibo ti nasao a sakit.
Kabayatanna, iti segundo distrito, iti siudad ti Batac ti kaaduan a dumanon iti 68 a kaso, 21 a kaso manipud iti ili ti Pinili ken 20 iti ili ti Solsona.
Ti nasao a datos ket manipud idi bulan ti Enero agingga iti Hulio 5 iti agdama a tawen.
Mainaig iti daytoy, naminsan manen a nagballaag ni Balalio nga ugalien ti 5S, wenno ti Search and Destroy, Self-protect, Seek consultation, Support fogging ken sustain hydration.
Innayonna nga ita a tiempo ti panagtutudo, siguradoen a nadalus ti aglawlaw kangrunaanna kadagiti lugar a magustoan a pagitlogan dagiti lamok.
