LAOAG CITY – Dumanonen iti 637 dagiti nakaparehistro ditoy siudad ti Laoag para iti Barangay and Sangguniang Kabataan Elections.
Segun ken ni Ms. Crisanta Alejandro, Election Assistant II ti Commission on Elections ditoy siudad, sipod nangrugi ti voters registration ket adu metten dagiti agturturong iti opisinada tapno agparehistro.
Inlawlawagna a ti kangrunaan a problema a makitkita iti panagparehistro dagitoy ket dagiti “over voting age” a no apay saan pay dagitoy a nakaparehistro iti baet a limmabesen dagiti tawenda.
Kunana a salsaludsudenda pay no dagitoy ket dati a nakaparehistron iti sabali a lugar, local man wenno iti international gapu ta ma-detect daytoy iti sistemada.
Mainaig iti daytoy, inpakaammo ni Alejandro a dagiti agparehistro nga agtawen ti 15 agingga iti 18 ket kasapulan nga itugotda ti birth certificate wenno valid ID idinto a dagiti agsukat iti status-da wenno correction of entry ket ti marriage certificate ken birth certificate ti itugot dagitoy.
Kabayatanna, ginutigot ni Alejandro dagiti agtutubo a mapan agparehistrio tapno makipagpaset iti Barangay and Sangguniang Kabataan Elections.
Maipalagip a nangrugi idi Agosto 1 ken agngudo inton Agosto 10 ti pannakaisayangkat ti voters registatrion para iti Barangay and Sangguniang Kabataan Elections.
