LAOAG CITY – Nabayagen nga inyimplementar ti Mariano Marcos Memorial Hospital and Medical Center (MMMH&MC) iti ciudad ti Batac ti zero-balance billing program.
Daytoy ti inpakaammo ni Dr. Maria Lourdes Otayza, ti medical center chief iti nadakamat nga ospital kabayatan ti selebrasyon ti national hospital week.
Kunana nga 6 a tawenen sipud rinugyan da nga inyimplementar da ti zero-balance billing kas immunan a mandar ti Department of Health kadagiti pampubliko nga ospital iti pagilian.
Inbatad na nga adda dagiti ospital a narigatan iti pannakaimplementar ti programa da ngem iti Mariano Marcos Memorial Hospital and Medical Center ket inkarigatan da nga inpatungpal para kadagiti pasyente da.
Segun kenni Otayza, ti zero billing program ket saan laeng a nakatulong kadagiti maibilang nga indigent patients ngem pakairamananen dagiti cancer patients ken dagiti dumaldalan ti dialysis.
Gapo iti daytoy, kunana nga immado dagiti pasyente da gapo ta ammo dagitoy a libre ti serbisyo nga ipapaay ti nadakamat nga ospital.
Maysa kadagiti inpanakkel ni Otayza a nabenepisyaran ket ti maysa a breast cancer patient a binigbig na a ni Mylene Aguilar a taga Barangay 3 iti ciudad ti Batac.
Kunana a napalaos ti panagyaman ni Aguilar iti Mariano Marcos Memorial Hospital and Medical Center gapu iti ipapaay da a cancer benefit package a masakupan na ti outpatient ken inpatient services a pakairamanan ti diagnostics, therapeutic procedures, agas, treatment ken management services, ken dadduma pay a care-related components ti cancer.
Inpakaammo pay ni Otayza a no adda dagiti cancer patients a kayat na ti manggundaway iti cancer benefit package ket agrehistro laeng iti Cancer Assistance Fund ti Department of Health.
Nupay kasta, inlawlawag na a no adda dagiti saan nga available nga agas ket kasapulan a gumatang dagiti pasyente iti ruwar.
Ti Mariano Marcos Memorial Hospital and Medical Center ket maysa kadagiti 31 a cancer treatment sites ti Department of Health a nadutukan a mangiwayat ti libre nga screening ken konsultasyon tapno nasapsapa a maduktalan ti sakit a cancer ken maipaayan a dagus ti agas dagiti pasyente.
