LAOAG CITY – Iggemen ni Presidente Ferdinand Marcos Jr. dagiti nagan dagiti opisial a responsable kadagiti palpak a flood-control projects a nangitunda ti nalawa a panaglayos kadagiti sumagmamano a paset ti pagilian.
Nauktalan nga adda dagiti sumagmamano nga indibidual ken korporasion a karaman iti palpak a proyekto ti Department of Public Works and Highways ken dandanin a ma-blacklist kadagiti proyekto ti gobierno.
Iti kaudian a podcast episode ni Presidente Marcos, iti baet a saanna a ninaganan no asino dagiti dakdakamatenna a contractors, inpettengna a dandanin a mapilaan ti kaso dagiti indibidual ken dagiti kompania a karaman iti substandard projects.
Inlawlawagna a saan nga agpangadua a pagsungbaten ti asinoman a mapaneknekan a nagkurang iti responsibilidadna uray kasano ti kangato ti posision daytoy.
Kunana a dagiti korporasion nga addaan ti contractor ket makita a saan a napintas ti trabahona isu a maikabilda iti blacklist tapno saanen a naan-anay a makakontrata iti gobierno.
Innayonna a mapilaan ti kaso dagiti kompania ken opisial a mapaay nga agpalawag no ayanno ti nakaikabilan ti pundo a ginastos kadagiti proyekto.
