LAOAG CITY – Maiyakar ti lokasion ti Todomax Flower Garden and Vegetable Garden iti Barangay 29 Sto. Tomas ditoy siudad ti Laoag.
Daytoy ti kinumpirmaran ni Engr. Shiela Opelac, mangidadaulo ti City Agriculture Office ditoy siudad ti Laoag.
Inbatadna nga adda ti saan a panagkinnaawatan ti akinkukua ti lote ken ti farmers association iti nasao a barangay isut gapuna a maiyakar daytoy iti lokasionna.
Inlawlawagna nga iti agdama ket saanen nga agop-operar iti nasao a vegetable and flower garden.
Nupay kasta, inpasingked ni Engr. Opelac a rugianandanto manen ti mangestablisar ken adda dagiti posible nga area a para iti agri-tourism a manamanma a maiyimplementar iti daytoy a tawen ken iti sumarsaruno a tawen.
Maipalagip a nalukatan daytoy iti publiko idi laeng Disiembre ken naammoan nga agarup 3,000 square meters ti kalawa ti nakaimulaan dagiti nagduduma a klase ti nateng ken sabsabong.
