LAOAG CITY – Nakita ti residente ti maysa a granada iti igid ti kalsada iti Barangay Balacad ditoy siudad ti Laoag.
Segun ken ni P/Capt. Rudy James Jacalne, Deputy Chief of Police ti Laoag City Police Station, ti nakakita ti granada ket maysa a lalaki nga agtawen ti 51 ken residente ti Barangay San Guillermo ditoy siudad.
Inbatadna a basar iti pannakisarsaritada iti nasao a lalaki ket nagturong daytoy iti lugar tapno mapan mangala ti balangeg.
Kunana a naripar ti lalaki ti maysa nga eco bag nga agmaris ti green ken apaman a napanna inasitgan ket ditoy a nakitana a naglaon daytoy ti granada.
Inlawlawagna nga insigida nga inpakaammo ti lalaki iti kuerpo ti pulisia ti nakitana a granada.
Mainaig iti daytoy, basar iti Explosive Ordnance Disposal ti Ilocos Norte Police Provincial Office, posible a nabiit pay a naikabil ti granada iti nasao a lugar ken posible pay daytoy a bumtak iti baet nga aglatlati daytoyen.
Naammoan a ti nasao a granada ket maysa nga MK2 fragmentation hand grenade.
Innayon ni P/Capt. Jacalne a daytoyen ti maikadua a daras nga adda ti narekobreda a granada no sadinno nga immuna ket iti Barangay 28 ditoy siudad ti Laoag iti napalabas laeng a bulan.
