LAOAG CITY – Maimimbestigaranen ti insidente a maipagarup panagpaputok ti paltog ti maysa nga indibidual iti maysa a resto-bar ditoy siudad ti Laoag kalpasan ti pannakaiparuk-at ti Press Statement manipud iti Laoag City Police Station.
Basar kadagiti otoridad, addan iti kustodiada ti kopya ti CCTV footage idi napasamak ti nasao nga insidente.
Basar iti nasao nga Press Statement ket manarimaaanen ti panagimbestigarda kadagiti amin nga ebidensia a naalada.
Maipalagip a napasamak ti nasao a panagpaputok ti paltog idi parbangon ti Agosto 8 iti oras ti 1:22 no sadinno ket basar kadagiti impormasion ket kinarit dagiti United States Army a mangiyusyuswat ti Balikatan Exercise ditoy probinsia ti nasao a dati a Kapitan a nagpaputok ti paltog no sadinno ket ginundawayan ti nadakdakamat nga indibidual dagiti body guard-na a sumango kadagiti karirina nga Amerikano ket apaman a nakitana nga aggugulo dagiti Amerikano ken dagiti body guards-nan ket ditoyen a nagpaputok ti paltog iti tangatang ti dati a kapitan.
Gapu iti daytoy, naipadanon ti video ti insidente iti 58th Regular Session ti 13th Sangguniang Panlungsod, nga indauloan ni Hon. Rey Carlos M. Farinas no sadinno ket nagbalin a sentro ti session ti nasao nga insidente.
Kabayatanna, iti agdama, awan pay ti testimonia ti dati a a kapitan a maitudtudo a nagpaputok ti paltog.
