LAOAG CITY – Inlawlawag ni Commission on Elections Chairman George Erwin Garcia a dagiti contractor kadagiti proyekto ti gobierno ket saan a mapalubusan a mangipaay ti pundo kadagiti kandidato.
Inbatadna a daytoy ket panaglabsing iti Section 95 (c) ti Omnibus Election Code ken adda ti maiyannatop a pannusa nga agingga iti innem a pannakaibalud ken pannakaikkat ti lisensia ken permit ti kompania.
Kabayatanna, nagkedked met ni Garcia a sungbatan iti saludsod no ania ti mabalin a sangoen a pannusa dagiti naelektaran nga opisial a naglabsing iti daytoy.
Immunan nga inbutaktak ni Presidente Ferdinand Marcos Jr. nga adda iti 15 a contractor laeng ti nakaala ti 20% a dumanon iti P545 bilyon a budget ti gobierno para iti flood control projects.
Inadmitir iti kallabes ni Senate President Francis “Chiz” Escudero a maysa kadagiti campaign contributor daytoy iti 2022 elections a ni Lawrence Lubiano, Presidente ti Centerways Construction and Development Inc. a maysa kadagiti 15 a contractor a dinakamat ni President Marcos.
Nupay kasta, naiget a naglikudan ni Escudero a karaman isuna iti aniaman a flood control projects iti probinsia daytoy idiay Sorsogon ken dadduma pay a paset ti pagilian.
Innayonna a kaaduan kadagiti kontrata ti Centerways ket nakaala dagitoy sakbay pay a nagbalin manen a Senador.
