LAOAG CITY – Kalikagum ti Sangguniang Panlalawigan nga adalen ti maysa a mobile app para kadagiti tricycle ditoy probinsia.
Segun ken ni Bokal Marlon Sales, daytoy ket inisyatibo ti Metro Ilocos Norte Council nga inawaganda ti nasao nga application ti JOYRIDE.
Inbatadna nga adu pay ti kasapulan nga ikonsiderar a mapagsasaritaan kas ti boundary franchise dagiti tricycle.
Inlawlawagna a makikoordinarda kadagiti Local Government Units a mapalukayan ti territorial jurisdiction dagiti agpaspasada a tricycle.
Kunana a napintas daytoy a programa gapu ta saan met a makissayan ti plete ngem adda ti convenience fee-na nga 45 a pisos nangruna no agtudtudo.
Mainaig iti daytoy, inpakaammo ni Sales a sinaludsod ni Bokal Saul Paulo Lazo no kasano a kontrolen ti mobile app gapu ta adda ti maysa a prangkisa ngem addaan ti lima a driver daytoy.
Innayonna a no asino dagiti mapaneknekan a naglabsing iti maiyatnag a pagannurotan ket posible a maikkat ti membership daytoy iti JOYRIDE.
Kabayatanna, nagbalin met a positibo ti takder ni Mr. Elmer Castañeda, maysa a tricycle driver maipanggep iti pannakailungalong ti nasao a mobile app a dakkel a makatulong iti panagpasada dagitoy.
