LAOAG CITY – Inlawlawag ni Liga ng mga Barangay President Ryan John Pascua no kasano a mapili ti lima a benepisiario ti Bagong Pilipinas Barangay Presidential Scholars Program.
Daytoy ket kalpasan a maipagarup nga adda ti pabpaboran dagiti opisial ti Barangay Puyupuyan iti ili ti Pasuquin iti panangpili kadagiti kabarangayanda nga agbalin a benepisiario iti nasao a programa.
Segun ken ni Pascua, dagiti mapili a benepisiario ket maibasar iti estado ti panagbiag dagiti estudiante ken dagiti ad-adda nga agkasapulan iti daytoy.
Inbatadna nga adda ti bukud a datos ti barangay secretary isut gapuna nga ammoda ti pudno a kasasaad iti panagbiag ti maysa a residente iti lugarda.
Mainaig iti daytoy, inpetteng ni Sangguniang Panlalawigan Member Rafael Medina a masapul nga agbalin a nalawag dagiti pagannurotan iti panangpili kadagiti estudiante nga agbalin a benepisiario iti scholarship program tapno maliklikan ti problema.
Maipalagip nga inpakaammo ni Barangay Chairman Romulo Aguinaldo ti Barangay Puyupuyan iti ili ti Pasuquin a planona a paayaban dagiti kagawadna gapu ta dagiti agpampammarang a grantees ti scholarship program ket maipagarup nga annak dagiti kakaduana nga opisial.
Immuna iti daytoy, babaen ti Presidential Scholarship Program ket napundoan ti tunggal barangay ti aggatad P100,000 ken naikkanda ti bileg a pilien ti lima nga estudiante ti kolehio a nasken a maikkan ti sag-P20,000 a tulong para iti educational expenses-da.
Kabayatanna, naaprobaran ti nasao a gakat iti maikadua ken maudi a pannakaibasana iti Sangguniang Panlalawigan.
