LAOAG CITY – Aminado ti kampo ti nakabalud a ni Pastor Apollo C. Quiboloy a possible a maipatungpal ti extradition uray adda dagiti nakapenpen a kaso a sangsangwen na.
Segun iti legal counsel ni Pastor Quiboloy a ni Atty. Israelito Torreon, inadmitir na a daytoy ket saan nga impossible a mapasamak.
Kuna na nga adda ti bileg ti estado ti pagilyan no patgan na ti kiddaw ti Amerika nga extradition para iti nasao a pastor.
Ni kontrobersyal a ni Quiboloy ket sumangsango ti agsusukot a kaso kas ti child sex trafficking, fraud, ken dadduma pay, nga iti agdama ket wanted pay iti Estados Unidos.
Inpetteng ni Atty. Torreon a nupay possible a maipatulod ti akusado iti Amerika, opsyon paylaeng ti Pilipinas nga ileppas nga umuna dagiti nakapenpen a kaso na sakbay a trataren ti extradition.
Mainaig iti daytoy, kuna ni Torreon nga agpapan ita ket saan da pay a naawat ti aniaman a dokumento wenno pormal a kopya iti ‘Extradition Request’ ti Estados Unidos.
Kabayatanna, kiniddaw ti kampo ni Pastor Quiboloy iti Amerika a respetaren na ti soberanya ti Pilipinas mainaig iti ‘extradition request’ na.
Inpaganetget ti abogado nga addan iti korte ti Pilipinas dagiti kaso ti kliyente na isut gapuna a rumbeng nga ipabus-oy da paylaeng daytoy.
