LAOAG CITY – Naragsak nga inpakaammo ni Ms. Jeunesse Imnas Fronda, RND Nutritionist-Dietitian II ti Mariano Marcos Memorial Hospital and Medical Center iti siudad ti Batac nga adu ti maala a benepisio iti salun-at ti pannangan ti uong.
Segun kenkuana, ti uong ket baknang iti protina, low fat, mangpababa ti tsansa a maaddaan ti cancer, mangpababa ti cholesterol ken mangipaay ti nagduduma a bitamina.
Inbatadna ubing man wenno nataengan pakairamanan dagiti masikog ket mabalin dagitoy a mangan ti uong.
Nupay kasta, inlawlawagna a masapul nga ammo dagiti maseknan ti mabalin a kanen nga uong ken ti makasabidong nga uong tapno maliklikan ti pannakairisgo ti biag.
Mainaig iti daytoy, kuna ni Fronda a dagiti nasken a liklikan a klase ti uong a makasabidong ket dagiti adda ti nagbubukel iti ngato a pasetna ken agsukog kas payong.
Inpettengna nga uray saan a napait ti uong ket posible latta a makasabidong daytoy.
Inpalgakna a dagiti indibidual a nangan ti makasabidong nga uong ket mabalin a makarikna ti panag-vomit, panagrugit, marigatan nga umanges ken makapasar ti allergic reactions iti kudilna a masapul nga insigida nga agpakonsultar iti kaasitgan nga ospital para iti naan-anay a pannakatamingna.
Innayonna a no saan nga insigida a mataming ti maysa nga indibidual a nangan ti makasabidong nga uong ket posible a makaitunda iti pannakatay.
Naammoan nga iti agdama ket awan ti naipadamag wenno nairekord iti departamentoda nga adda ti naitaray gapu iti makasabidong nga uong.
Immuna iti daytoy, rumrummuar a nasabidongan ti tallo a miembro ti pamilia kalpasan a maipagarup a nangan ti uong iti Barangay Manlocboc idiay Aguilar, Pangasinan.
