LAOAG CITY – Inpalgak ni Senador Ping Lacson nga umok dagiti sindikato a kriminal ti Department of Public Works and Highways (DPWH).
Segun iti senador, nakaawat kadagiti baro nga impormasyon a mangipakpakita iti mala-mafia nga operasyon ti sumagmamano nga engineering offices ti ahensya iti nagduduma a lugar iti pagilian.
Inbutaktak ni Lacson a karaman ti sumagmamano nga opisyal ti Department of Public Works and Highways iti maanomalya a flood control projects, karaman dagiti saan a nairaman iti report a naidanun ken ni Presidente Ferdinand Marcos Jr.
Innayon na nga ado pay ti kalokoan iti uneg ti ahensya, kas kadagiti district engineer a manggamgamulo kadagiti proyekto ken uray iti Philippine Contractors Accreditation Board nga addaan metlaeng ti bukod nga anomalya.
Inpetteng pay ni Lacson a dagitoy a mala-sindikato nga aktibidad ket saan laeng nga iti Bulacan no di ket uray pay iti dadduma a lugar kas iti San Carlos City iti Negros Occidental.
Immunan nga inbutaktak na iti privilege speech na ti korapsyon kadagiti flood control project iti Pampanga, La Union, ken Oriental Mindoro.
