LAOAG CITY – Mamati ni Sangguniang Bayan Member Efren Butay iti ili ti San Nicolas a masapul a kanayon ti pannakaisayangkat ti public consultation sakbay a maiyimplimentar dagiti infrastructure project.
Segun kenkuana, daytoy ket tapno maammoan no ania ti epektona kadagiti end user.
Inlawlawagna a kas ti napasamak a flood control project iti Barangay 16 ket adda dagiti sumagmamano a pagtaengan nga adda iti risgo gapu iti saan a napintas a pannakaaramidna daytoy.
Inbatadna nga apaman a napanda binisita ti lugar, naobserbaranna a saanda a naantisiparan ti danum manipud iti bantay nga ad-adda a mangdadael ti flood control no idasig ti danum iti karayan.
Daytoy ti rason no apay a pinaayabanda ti Department of Public Works and Highways tapno mailawlawag no apay kastoy ti situasion ti nasao a flood control.
Naammoan a namindua a nadadael ti Phase 1 gapu kadagiti naglabas a bagyo ken ita ket manarimaanen ti Phase 2.
Kuna ni Butay a daytoy ket maibilang a continuing project a kayatna a saoen ket tinawen a mapundoan.
Nupay kasta, iti laksid a nakapagsasaritadan iti Department of Public Works and Highways nga urnosen ti nasao a proyekto ngem awan pay ti nakitana a nagbaliwanna sipod idi immuna a napanda kinita kaduana ti maseknan nga ahensia ti gobierno idi Hunio.
