LAOAG CITY – Manamnama ti panangiyapela ni Sarah Discaya ti desisyon ti Philippine Contractors Accreditation Board (PCAB) a panangibabawi iti contractor licenses kadagiti siyam a construction companies na.
Segun iti abogado ni Discaya a ni Atty. Cornelio Samaniego III, panaglabsing iti due process ti inaramid ti Philippine Contractors Accreditation Board.
Inlawlawag na nga ummunan a kiniddaw ti kampo ni Discaya iti Philippine Contractors Accreditation Board a maikkanda ti 30 nga aldaw tapno agisubmitir kadagiti kasapulan a dokumento iti baet ti imbestigasyon kadagiti construction firms.
Nupay kasta, inbatad ti abogado a nakigtot da laengen iti dagus a panangbabawi ti Philippine Contractors Accreditation Board ti lisensya dagiti kompanya ti kliyente na.
Kabayatanna, naamoan a naglabsing ni Discaya ti Board Resolution No. 075, Series of 2025 gapo ta naduktalan a kukuana dagiti kompania a nakipagpaset iti bidding para iti maymaysa a proyekto ti gobierno.
Karaman ditoy ti St. Gerrard Construction, Alpha & Omega, St. Timothy Construction, Amethyst Horizon Builders, St. Matthew General Contractor, Great Pacific Builders, YPR Construction, Way Maker OPC, ken Elite General Contractor.
