LAOAG CITY – Ginutigot ni Department of Justice Secretary Jesus Crispin Remulla dagiti indibidual a karaman iti anomalya iti ‘flood control projects’ nga isubli ti kwarta nga inbulsa da.
Mamati ti Justice Secretary a rumbeng a maisubli ti kwarta manipud iti pondo dagiti tattao.
Inpetteng pay ni Justice Secretary Remulla a ti lugi wenno dehado kadagiti ‘ghost projects’ ket mismo a dagiti tattao.
Inbatad na pay a nakalukat ti opisina na para kadagiti agkalikagom nga agtestigo wenno agbalin a ‘whistleblower’ tapno makatulong iti imbestigasyon.
Kunana a ti alaen ti Department of Justice kas ‘state witness’ ket ti ‘least guilty.’
Mainaig iti daytoy, kunana a mas mapaalisto ti trabaho no addan ti iggem nga ‘state witness’ ti ahensya para iti imbestigasyon.
Inlawlawag na a nupay mabalin a mapaawan basol iti kaso kriminal, saan na a kayat a sawen a makalusot daytoy iti civil liability.
Kabayatanna, inbatad pay ti sekretaryo nga iti agdama ket adda ditoy Pilipinas ti pamilya Discaya a mairamraman iti
maanomalya a ‘flood control projects’.
Dagiti agasawa a Sarah ken Pacifico Discaya ket isu ti ummuna iti listaan ti ahensya iti ‘Immigration Lookout Bulletin Order’.
