LAOAG CITY – Nagbinnulig ti Public Employment Service Office ken iti Technical Education and Skills Development Authority (TESDA) tapno isayangkat ti sabali manen a job fair ditoy probinsia.
Daytoy ket paset iti programa ti gobierno probinsial a naruay a panggedan.
Segun ken ni Ms. Liz Atuan, mangidadaulo ti Public Employment Service Office iti probinsia, napintas a gundaway daytoy kadagiti fresh graduate, kadagiti agsapsapol ti panggedan, ken kadagiti mangayat iti a mangpadas ti baro nga oportunidad.
Kunana a daytoy ket maangay iti dakkel a mall iti ili ti San Nicolas inton Setyembre 13, iti agdama a tawen.
Inpalagip na a kadagiti mangayat a nakipagpaset ket itugot laeng ti resume ken dadduma pay nga importante a masapol nu agapply iti trabaho.
Inpasigurado ni Atuan nga awan sarday ti panangipaay da ti oportunidad kadagiti kaprobinsiaan tapno magun-od ti kalikagum ti gobernador ken bise gobernador a makaidiaya ti trabaho.
Immunan iti daytoy, inbatad ni Atuan a maysa kadagiti programa ti gobierno probinsial ket ti mangipaay panggedan kadagiti kakailian tapno saanen a kasapulan pay nga agtrabaho dagitoy iti ballasiw-taaw.
