LAOAG CITY – Pimmusay ti dati a First Lady ti Nepal kalpasan a pinuuran dagiti protesters ti pagtaengan na.
Nabigbig daytoy a ni Rajyalaxmi Chitrakar ken asawa ni dati a Prime Minister Jhalanath Khanal.
Namunganay daytoy iti panagpungtot dagiti demonstrador iti panangi-ban ti gobierno kadagiti 26 a social media platforms pakairamananen ti Facebook ken Youtube.
Naitaray ni Chitrakar iti Kirtipur Burn Hospital ngem pimmusay met laeng gapo kadagiti sinagabana a sugat.
Malaksid iti pagtaenganna, pinuuran pay dagiti tattao ti pagtaengan ti nagikkat a Prime Minister a ni KP Sharma Oli kalpasan met ti panangisayangkat na ti cross-party meeting para iti panagsardeng ti tignay protesta.
Nupay kasta, saan nga epektibo ti panagikkat ni Oli tapno agsardeng ti tignay protesta.
Naamoan met a nagtalinaed dagiti rinibo a demonstrador kadagiti kalsada, sinerraan da dagiti dalan, rinaot ken pinuuran da dagiti pasdek ti gobierno ken dagiti dadduma a political leaders ket tinarget pay dagiti tattao isut gapot na a naipan dagitoy iti natalged a lugar babaen ti army helicopter.
Maipalagip nga umaboten iti 19 a tattao ti natay ken naruay dagiti nasugatan gapo iti tignay protesta a nangitunda iti gulo ken nagusar dagiti otoridad iti water cannons ken batons ken iti rubber bullets.
