LAOAG CITY –Na-rescue dagiti dua a Nepali workers manipud iti hydropower tunnel idiay Nepal, siam nga aldaw kalpasan a na-trap-da gapu iti nasaknap a layus ken panagreggaay ti daga iti lugar.
Nabigbig dagiti survivor nga isuda Sanjay Sah, maysa a mechanical foreman, ken Kabir Maharjan, maysa a mechanical supervisor. Agpada a nasarakanda iti tunnel ti Upper Trishuli 3A Hydropower Station iti distrito ti Rasuwa.
Segun kadagiti otoridad, nangngeg ti rescue team dagiti timek manipud iti uneg ti tunnel sakbay a naammuanda ti ayan dagiti dua. Dagus a naguyod dagitoy ken naipadalan iti medical para iti pannakatamingda.
Ti pannakaisalakan dagiti dua nga indibidual ti nangipaay iti baro a namnama kadagiti pamilia ti sabali pay a nayaw-awan. Mabalin a napattapatta a 900 a trabahador ti na-trap kadagiti tunnel ti nadumaduma a hydropower projects iti paset ti Karayan Trishuli kalpasan ti didigra idi Agosto 26.
Agtultuloy ti search and rescue operations bayat nga ikagkagumaan dagiti otoridad a danonen pay ti dadduma a tunnel a napno iti pitak, bato, ken dadduma pay a debris.
Ti didigra ket gapuanan ti nakaro a layus a sinaruno ti panagreggaay dagiti glacier, bato, ken pitak iti lugar. Rinibu ti natay wenno mapukpukaw idiay Nepal kalpasan ti didigra.
