LAOAG CITY – Inlawlawag ni National Bureau of Investigation (NBI) Director Jaime Santiago nga awan ti pagbasaran tapno maibalod ti drug war whistleblower ken retired police colonel Royina Garma.
Segun kenni Santiago, iti agdama ket awan pay ti active warrant of arrest kontra kenni Garma manipud iti House of Representatives ken Senado iti babaen ti 20th Congress.
Inbatad na a nupay adda ti warrant nga inisyu idi 19th Congress, nag-expire daytoyen iti panaglippas met ti 19th Congress.
Malaksid iti daytoy, inadal da met amin a legal records ni Garma isut gapo na a ti laeng maaramid da ket i-monitor ken siguradoen ti seguridad ni Garma.
Kuna pay ti NBI chief a dagus a nangipatulod ti maysa a team a makikinnita kenni Garma kalpasan a nakaawat ti impormasyon a simmangpet ditoy Pilipinas.
Iti sumaruno nga aldaw ket naamoan ti NBI a manamnama a rumuar ni Garma para iti pannakitaripnong na iti International Criminal Court officials.
Inpetteng na a saan da met a malapdan ni Garma a sumuar iti pagilyan a nangibaga ti panagamak na iti kaadda na ditoy Pilipinas.
Maipagalip nga inbutaktak ni Garma ti maipagarop a reward system iti babaen ti war on drugs ni dati a Pres. Rodrigo Duterte iti imbestigasyon idi ti House Quad Committee mainaig iti extra judicial killings ti pagilyan.
