LAOAG CITY – Maipabaro ti pinta dagiti amin a barangay hall pakairamanan ti Plaza ditoy siudad ti Laoag.
Segun ken ni Mayor James Bryan Alcid, daytoy ket babaen ti pangipaay a libre a pinta ti Davies Paint iti lokal a gobierno.
Inbatadna nga addan ti immun-unan a pannakisaritana iti nasao a kompania no sadinno nga inpasingkedna mangidonar daytoy kadagiti mausar a pinta.
Inlawlawagna a dagiti maidonar a pinta ket mausar kadagiti amin a barangay hall pakairamaman ti Plaza ken dadduma pay.
Kunana a dumanon iti uppat aginnga iti lima a milyon a pisos ti balor dagiti maipaay a pinta babaen ti nadakamat a kompania.
Naammoan a malaksid iti pinta ket karaman pay ditoyen dagiti magastos para iti labor.
Innayonna a napagnunumoanda iti nasao a kompania nga iti kada tallo a tawen ket mangipaay dagitoy ti libre a pinta.
Maipalagip nga immunan a nangidonar ti Pacific Paint Boysen Philippines Incorporated iti lokal a gobierno para iti pannakaipabaro ti pintas iti Laoag City General Hospital ken iti Laoag City Public Market and Commercial Complex.
