LAOAG CITY – Kinumpirmaran ni Senate President Pro-Tempore Ping Lacson nga adda ti P355 million budget insertion para iti flood control projects idiay Bulacan ita a tawen.
Maipalagip nga iti Kamara de representantes ket intudo ni dati a Bulacan Assistant District Engineer Brice Hernandez ni Senador Jinggoy Estrada a maipagarop a nangilatang ti nasao a kantidad kasukat ti 30% a komisyon.
Segun ken ni Lacson, rimuar iti pananginspeksyon da a pudno a naipalaon iti 2025 General Appropriations Act ti P355 milyon, ngem awan iti National Expenditure Program ken iti House budget version.
Inpetteng na a nalawag a daytoy ket naipalipit iti Senado wenno bicam.
Nupay kasta, saan a maestablisar no siasinno nga agpanpanday linteg ti nangiserrek ti pondo.
Lima a proyekto ti sakupen daytoy ken ti panangadal ni Lacson ket lehitimo ti implementasyon.
Kas panangrespetar iti inter-parliamentary courtesy, possible a maisarita paylaeng ni Lacson ken ni dati a Senadora Grace Poe, a nangidaulo idi iti Senate Committee on Finance, tapno amwen ti pudno a proponent ti nasao a budget.
Kinumpirmaran pay ni Lacson a bimmisita iti Senado ti nangibagi ti WJ Construction Company a dinakamat ni Hernandez iti panagdengngeg iti Kamara de representantes kas agikabkabil ti “obligasyon” wenno lagay.
Kuna ni Lacson, maysa nga agnagan ti Mina ti nagturong iti Senado idi Agosto 19, 2025 ken pinarebisar na dagiti CCTV footage tapno maamoan no sadinno nga opisina ti nagturungan na ken no siasinno ti nakasarita na.
Innayon ni Lacson nga addan ti ideya na no siasinno ti napanan ni Mina ngem inpetteng na a kasapulan a paawagan na daytoy tapno personal nga agpalawag.
