LAOAG CITY – Innagananen ti Malacañang ti dua a miembro ti mabukel nga Independent Commission for Infrastructure (ICI) nga agimbestigar iti anomalya iti flood control projects.
Iti press conference, kuna ni Palace Press Officer Undersecretary Atty. Claire Castro, karaman a nadutukan kas commission members ket ni dati a Public Works secretary Rogelio “Babes” Singson ken Rossana Fajardo, ti country managing partner ken auditing firm SGV and Co.
Ni met Baguio City Mayor Benjamin Magalong ti agserbi kas special adviser ken imbestigador iti nasao a komisyon.
Mismo a ni Pres. Ferdinand Marcos Jr. ti pangirakurak no siasinno ti agbalin a chairperson wenno mangidaulo iti Komisyon.
Ni Singson ket nagserbi kas DPWH chief sipud July 2010 agingga iti June 2016 iti babaen ti administrasyon daydi Benigno Simeon “Noynoy” Aquino III.
Iti napalabas a bulan ti Agosto, inadmitir ni Singson a nakaawat ti feelers manipud iti Malacañang a mangidiya kenkuana nga agsubli iti ahensya.
Maysa pay a miembro ket manipud iti pribado a sektor a ni Fajardo a nagtugaw kas mangidaulo iti SGV idi Hulyo 1.
Ummunan nga inbatad ni Marcos nga awan ti pulitiko a karaman iti komisyon.
Ni Magalong, dati a police general ken agdama a Baguio City mayor, ti nagirakurak metten iti maipagarop nga anomaly iti flood control ken infrastructure projects.
Maipalagip a kiniddaw pay ni Malacañang kenni Magalong kenni Pres. Marcos nga isubmitir na dagiti impormasyon mainaig iti anomaly.
Iti Executive Order No. 94 ti presidente, ti “three-man team” ket isu ti agimbestigar ken agukkon kadagiti ebidensya, intelligence reports, ken impormasyon komtra kadagiti amin nga opisyal ken empleado ti gobierno kasta met kadagiti indibidual a karaman iti anomaly, iregularidad, saan nga usto a pannakausar ti pondo iti planning, financing, ken implementasyon ti flood control ken dadduma pay nga infrastructure projects iti pagilyan.
Prayoridad met ita iti imbestigasyon ti komisyon ti flood control ken dadduma nga infrastructure projects iti napalabas a 10 a tawen.
Ti Independent Commission for Infrastructure ket isu pay ti mangirekomendar ti pannakaipila ti kaso criminal, civil, ken administrative cases kontra kadagiti responsable iti disciplinary, prosecutorial, ken administrative bodies.
