LAOAG CITY – Magatang ti sektor ti transportasyon iti 20 pesos iti kada kilo ti bagas mangrugi intono bigat, Setyembre 16.
Segun iti Department of Agriculture (DA), adda ti inisyal a 57,000 a mangmangged iti pampubliko a transportasyon ti manamnama a mabenipisyaran iti nalaka a presyo ti bagas.
Karaman iti programa ket dagiti driver ti bus, jeep ken tricycle kasta met dagiti transport operator.
Iti babaen ti programa, makagatang dagiti driver ken operator agingga iti 10 kilo ti bagas iti kada bulan.
Ummuna a maipatungpal ti subsidized rice para iti transport sector iti Bureau of Animal Industry idiay Quezon City no sadinno 17,000 ti benepisyaryo; iti Philippine Fisheries Development Authority idiay Navotas City nga addaan met ti 1,001 ti benepisyaryo; iti met Barangay Pandan iti Angeles City, Pampanga ket addaan ti 9,961 beneficiaries; iti Food Terminal Inc. idiay Cebu City ket 24,742 beneficiaries ken iti Tagum City nga addaan ti 3,650 beneficiaries.
Mabalin a magatang ti transport sector ti nalaka a bagas kadagiti designated distribution centers pakairamanan ti Philippine Fisheries Development Authority idiay Navotas, Bureau of Animal Industry and Agricultural Development Center idiay Quezon City, Agribusiness and Marketing Assistance Division idiay Cebu, Food Terminal Inc. warehouse iti Angeles ken Agribusiness and Marketing Assistance office idiay Tagum City.
