LAOAG CITY – Inlawlawag ni Bombo International News Correspondent Greg Pasalodos idiay United Kingdom a maysa kadagiti pagamkan da ket ti seguridad da nangruna ket ado dagiti iligal a simrek iti pagilyan da.
Segun kenni Pasalodos, ti rason ti panagprotesta dagiti tattao ket gapo ta arig na maipapaayan dagiti illegal immigrants kadagiti kasapulan da a para kuma kadagiti residente ken dagiti legal a simrek iti United Kingdom.
Kunana nga ado dagiti tattao a sumsumrek iti United Kingdom babaen iti bangka nga isu ti pagbutbutngan da nangruna ket addan dagiti naaramid dagiti illegal immigrant a krimen.
Maysa pay ket ti panaggastos ti pagilyan da iti pondo para laeng kadagiti saan a legal nga agnanaed iti United Kingdom a para kuma kadagiti marigrigat.
Inbatad na a ginasot a ribo dagiti makipagpaspaset iti nasao a tignay protesta a nangitunda ti pannakasugat dagiti ado a tattao.
Innayon na a kalikagom dagiti tattao a dengngen ti gobierno da ti arungaing da mainaig iti daytoy.
