LAOAG CITY – Inpakaammo ni Bombo International News Correspondent Hector Baytec manipud idiay Canada a ti panagangkat ti oil ken gas manipud idiay Canada ti maysa kadagiti napintas a resulta iti state visit ni Presidente Ferdinand Marcos Jr.
Segun kenkuana, dakkel a pakabenepisiaran ditoy Pilipinas no maipursige daytoy a banag aglalo ket agbirbirok ti pagilian ti mabalin a pagangkatan ti langis gapu iti riribok iti Middle East.
Inpannakkelna a maibilang ti Canada a kangrunaan a producer ti oil ken gas iti intero a lubong.
Inbatadna a ti oil ken gas ti Canada ket mabalin a maangkat a saan a kasapulan a dumalyasat iti Strait of Hormuz.
Inlawlawagna a makitkita ni Canadian Prime Minister Mark Carney a ti Asya ket manamnama a sumaruno a dumur-as iti ekonomia.
Mainaig iti daytoy, kuna ni Baytec nga adu a Pilipino ti iha-hire ti Canada iti benneg ti information technology, farming, nursing ken tourism gapu ta mamati ti Canada a nalaing a mangmangged dagiti Pilipino.
Innayonna a saan a maliklikan nga adda latta ti sumagmamano nga indibidual ti nangiwayat ti tignay protesta kabayatan ti panagbisita ni Presidente Marcos.
Kabayatanna, ita nga Hulio 4 ti maudi nga aldaw iti 4-day state visit ni Presidente Marcos idiay Canada.
