LAOAG CITY – Kiniddaw ni Konsehal Jason Perara ditoy ciudad ti Laoag kadagiti tricycle driver a saan unay nga agpartaray aglalo iti agkurba a paset ti kalsada.
Inaramid daytoy ni Perera kabayatan ti sesyon iti konseho ditoy ciudad ti Laoag no sadinno nga indanun na ti naimatangan na a pannakatnag ti maysa a babai a backride iti tricycle a nakaituparan ti ulo na.
Segun ken ni Perera, napardas ti taray ti tricycle ken mabalin a saanda paylaeng a nairuwam nga adda ti backride da.
Innayon na a ti met rason ti tricycle driver ket no apay a saan a nagkapet ti pasahero.
Kabayatanna, inpakaammo ni Konsehal JB Baquiran, chairman ti Committee on Transportation, a mangiwayat da ti public consultation mainaig iti napasamak.
Inlawlawag ni Baquiran a kaadoan kadagiti tricycle driver ket kalikagom da a tap box ti maipan iti likud ti tricycle tapno makaplastar a naimbag dagiti backride ken mabalin pay nga agserbi kas arm rest no ikompara iti tubo laeng gapu ta nagalis daytoy.
