LAOAG CITY – Maikkan ti walo a bulan a pawayway dagiti telecommunications company tapno urnosen a nasayaat dagiti spaghetti wires wenno dagiti agbibitin a waywaya ditoy probinsia.
Segun kenni Sang. Panlalawigan Member Hanson Chua, no saan a maplastar dagitoy ket naalas a kitkitan ken mangitunda iti desgrasya kangrunnaan no panagbabagyo.
Mainaig iti daytoy, kunana a mabalbalin pay a maguyod na ti poste rason iti pannakatumba dagitoy.
Kunana a masapol a maikkat a dagus dagiti agbibitin a waywaya gapo ta isupay a makapaperdi iti kita ti aglawlaw ken dadduma pay.
Malaksid iti daytoy, inbatad na a no adda pay laeng dagiti agreklamo mainaig iti daytoy a banag ket adda iti 10 nga aldaw tapno plastaren da dagitoy ngem no saan da a maaramid ket mapatawan dagitoy ti multa.
Maipalagip a nangipila ni Chua ti ordinansa iti konseho ditoy probinsia a kalikagum a maiplastar dagiti waywaya ditoy Ilocos Norte no sadinno kunana a nabayagen a problema ti spaghetti wires wenno dagiti agbibitin a waywaya iti telecommunications company.
