LAOAG CITY – Nangisubmitir anen ti kampo ni dati a Presidente President Rodrigo Duterte ti baro a “Defence Notification” iti International Criminal Court’s Pre-Trial Chamber.
Iti insubmitir na iti Pre-Trial Chamber 1 a naapetsaan ti September 16, 2025, kalikagom ti kampo ni Duterte ti pannakaipalubos ti interim release.
Basar iti defense team, ti nadakamat nga isyu mainaig iti kondisyon ti dati a presidente ket nairiingen sakbay pay ti initial appearance ken namindua dan a nagkiddaw.
Ummuna metten a kinontra ti Prosecution ti kiddaw ti dati a presidente ken kalikagom na nga agtultuloy a maibalod.
Kalikagom ti kampo ni Duterte a patgan itan ti International Criminal Court ti interim release kalpasan nga intantan nan ti hearing iti kaso a crimes against humanity.
Kunana a ti interim release ket saan a makaapektar iti proseso iti kaso.
Maipalagip nga inbatad ni Nicholas Kaufman, ti defense lawyer ni Duterte a saan a malagip ti dati a presidente dagiti napaspasamak ken uray dagiti miembro ti pamilya na.
Intantan ti International Criminal Court ti confirmation of charges ti kaso ti dati a presidente ken inpetteng ti kampo na a saan na a kabaelan ti agatendar iti trial.
