LAOAG CITY – Agtultuloy iti panagibunong ti gobierno probinsyal iti relief goods para kadagiti naapektaran ti super typhoon Nando ditoy probinsia babaen iti panangidadaulo da Gov. Cecilia Arenata Marcos ken ni Vice Governor Matthew Marcos-Manotoc.
Daytoy ti inpakaammo ni Mrs. Rochelle Gajes, ti mangidadaulo iti Provincial Social Welfare Development Office ti kapitolyo probinsyal.
Segun kenni Gajes, dagus napan nagibunong ti gobernador kadagiti relief goods wenno hygiene kits kadagiti nagduduma nga ili kas iti ili ti Pagudpud, Bacarra, iti ciudad ti Batac ken dadduma pay.
Inbatad na a karaman kadagiti naibunong a relief goods kadagiti maseknan a residente ket ti bagas, de lata, energy drink ken noodles.
Innayon na nga adda met iti umdas a supply iti relief goods a nakapenpen kadagiti bodega da ditoy probinsia.
Inpasigurado na nga iti kada pamilya a naapektaran ti super typhoon Nando ket makaawat ti relief goods.
