LAOAG CITY – Negatibo ti resulta ti search operation ti Philippine National Police nga inwayat na iti pagtaengan ni Barangay Captain Wilfred Quidilla Jr. iti Barangay 19, San Lorenzo iti ili ti San Nicolas.
Daytoy ti kinumpirmaran ni Police Captain Sygman Benigno, ti chief of Police iti nasao nga ili.
Segun kenni Benigno, nailanad iti search warrant ti panaglabsing iti Republic Act 10591 wenno Comprehensive Firearms and Ammunition Regulation Act of 2012 ken biruken da ti saan a lisensyado a kalibre 45 a paltog ken ti bala.
Inbatad na a nakaawat da ti reports a ti kapitan ket maipagarop nga agilemlemmeng ti saan a lisensyado a paltog.
Nupay kasta, iti panagsukimat da iti pagtaengan ti kapitan ket awan ti nakita da a paltog ken bala.
Mainaig iti daytoy, inbatad na a posible a nailemmeng ti paltog iti sabali a lugar gapo ta idi kuma pay laeng sakbay ti iduduprak ti bagyo ti panangiyuswat da iti operasyon.
