LAOAG CITY – Possible nga usaren ti lokal a gobierno iti ili ti San Nicolas ti nagatang a lote iti napalabas nga administrasyon iti Brgy. 16 a pakaipanan ti peryaan intono Damili Festival intono disyembre ita a tawen.
Segun kenni Mayor Edmar Vincent Bonoan, babaen iti nasao nga addang ket adda ti return of investment ti nagatang a lote.
Immunan a pinaraepan ti gobierno lokal ti partena a kataltalunan gapu ta maibilang daytoy nga irrigated rice land.
Inbatadna a babaen daytoy ket adda makatulong a pagalan ti pagbayad ti utang ti LGU .
Naamoan a ti tinawen a bayadan ti lokal a gobierno iti bangko ket 9,999,099.66 a capital ken 7.8 milyon nga interest ti nautang a 150 a milyon a pisos a naigatang iti lote iti uneg ti 15 a tawen.
Inbatad ni Bonoan a kakaasi ti 20% development fund gapu ta dakkel koma a mapan kadagiti basic service ken kadagiti nagduduma a programa ken proyekto para kadagiti umili.
Innayon na a daytoy ti rason no apay a nagdesisyon a saanna nga ituloy ti pannaka-develop wenno pagbalinen a government center ti nasao a lote gapu ta dakkel a pondo ti masapol.
Maipalagip nga immunan a kwinestyunaran ni Mayor Bonoan ti pannakairwar ti saving ti lokal a gobierno a 200 milyon manipod iti pakabuklan a 261 milyon a pisos iti napalabas nga administrasyon ken nakautang pay ti ili ti 150 a milyon a pisos a nainayun iti 270 milyon a pisos a naigatang ti lote.
