LAOAG CITY – Napan bimmisita ni Provincial Director Amelia Galvez iti Department of Trade and Industry iti manarimaan a Partuat ni Kailokoan Trade Fair iti dakkel a mall iti ili ti San Nicolas.
Daytoy ket kas panangipakita na ti naan-anay a suporta na kadagiti babassit a negosyante ditoy probinsya.
Inbatad ni Galvez a naitampok iti Partuat ni Kailokoan Trade Fair dagiti nagduduma a lokal a produkto ti probinsya wenno ti maaw-awagan ti “One Town, One Product”.
Gagem ti nasao nga addang ket tapno maiyam-ammo iti kaadoan dagiti produkto ditoy probinsya ken umado pay ti paglakoan dagiti maseknan a negosyante.
Ti Partuat ni Kailokoan Trade Fair ket nangrugi idi Setyembre 21 ken agpatinggan intono bigat, Setyembre 27.
Ginutigot met ti Department of Trade and Industry dagiti umili a mapan gumatang kadagiti nagduduma a produkto iti Partuat ni Kailokoan Trade Fair.
