LAOAG CITY – Umabot iti 40 a tattao ti natay iti panagrarapok dagiti naruay a tattao iti political rally iti southern Indian state tiTamil Nadu idiay India.
Rinibo a tattao ti nagtitipon iti political rally ni actor-turned-politician Vijay, iti southern Karur district.
Segun ken ni Tamil Nadu Chief Minister MK Stalin, karaman kadagiti pimmusay ket ti siyam nga ubbing, 17 a babbai ken 13 a lallaki.
Malaksid kadagiti natay ket adda pay ti agarop 51 a sabsabali dagiti manarimaan a maag-agasan iti ospital gapu kadagiti sinagaba da a sugat.
Gapu iti napasamak, nangipila ti kaso nga homicide ken negligent conduct dagiti otoridad kontra kadagiti tallo a miembro iti Vijay’s TVK party.
Naamoan a ti orihinal a nadakamat a bilang dagiti possible a makipaset iti political rally ket 10 ribo a tattao, ngem arigna nagdoble dagiti adda iti venue.
Immuna iti daytoy, kabayatan ti panagbitla ni Vijay iti Karur district ket bigla a dimmarop dagiti naruay a tattao tapno piliten nga isardeng na ti panagsarita na.
Indanun met a dagus ni Vijay ti pannakipagladingitna iti pamilya dagiti pimmusay ken mangnamnama iti alisto a panagrekobre dagiti adda iti ospital.
Innayon na a saanna a mailadawan ti sakit a marikrikna na gapu iti napasamak.
Kabayatanna, inpasingked ni Chief Minister MK Stalin a maipaayan ti 1-milyon rupees wenno kaibatugan ti $11,300 kadagiti pamilya a napukawan ti ipatpateg iti biag, ken maiyuswat pay ti naun-uneg nga imbestigasyon mainag iti insidente.
