LAOAG CITY – Natay ti 11 nga indibidual gapu iti Bagyo Bualoi idiay Vietnam.
Nadadael dagiti ginasgasut a pagtaengan iti sentro ken amianan a paset ti Vietnam idinto a dinosdosena met dagiti mapukpukaw wenno nadangran kalpasan a nag-landfall iti rabii ti Domingo ti nasao a bagyo kagiddan ti napigsa nga angin ken tudo.
Gapu iti daytoy, nalayos dagiti kalsada, naperdi dagiti rangtay ken naitayab dagiti galba dagiti pasdek sakbay a kimmapsot ken nagturong iti kaparanget a pagilian a Laos.
Mainaig iti daytoy, addan ti 20 nga indibidual ti pimmusay gapu iti Bagyo Bualoi ditoy Pilipinas sipod idi Biernes.
Naammoan nga adda ti 30 a ribu nga indibidual ti naibakwit idiay Vietnam.
Naitantan wenno nakanselar ti adu a flights ken napukawan ti serbisio ti kuryente iti central province ti Ha Tinh gapu iti epekto ti bagyo.
Nangiparuk-at ti pammilin ni Vietnamese Prime Minister Phan Minh Chinh ti napaspas a rescue ken relief efforts para kadagiti nagbalin a biktima.
Iti agdama, manarimaan ti panangbiruk dagiti rescuers ti 17 a mangngalap a karaman kadagiti mapukpukaw kalpasan a naarinebneb ti balsa dagitoy gapu iti dakkel a dalluyong.
Maipalagip nga iti napalabas a lawas, iti iduduprak ti Super Typhoon Ragasa a maibilang a kapigsaan a bagyo iti intero a lubong, adda ti 28 nga indibidual ti natay iti amianan a paset ti Pilipinas ken Taiwan sakbay a nag-landfall idiay Hong Kong ken China no sadinno nga agarup dua a milyon a tattao ti naibakwit.
