LAOAG CITY – Kalikagom ti Sang. Panlungsod ditoy ciudad ti Laoag a maddaan ti 100 a metro nga kaadayo ti kada fuel station.
Daytoy ket kalpasan a naobserbaran ti maysa a kameng ti konseho nga aggaabay dagiti sumagmamano a pagasolinaan ken ti dadduma ket asideg kadagiti pagadalan.
Segun kenni Konsehal John Michael Fariñas, ti Draft City Ordinance No. 13 SP—2025-030 wenno Laoag City Fuel Stations’ Guidelines for Accountability and Safety ket pakabuklan dagiti naisubmitir a committee reports ti Committee on Laws ken Committee on Trade and Industry.
Kunana a daytoy pay ti resulta ti panangtingiting ti legal counsel ken Bureau of Fire Protection kadagiti safety concerns dagiti fuel stations.
Inbatad na a daytoy nga ordinansa ket pagibasaran para iti panakaestablisar kadagiti fuel stations tapno masigurado ti kinatalged ti komunidad.
Inpakaammo na a nailanad ti nasao nga ordinansa ti natalged nga addang iti refueling wenno panagkarga iti tangke dagiti fuel stations, pannakaestablisar dagiti mandatory signages, zoning wenno distansya iti tunggal fuel station a 100 a metro ken 15 a metro a kauneg dagiti tangke manipod kadagiti kaabay na nga establishimento.
Inlawlawag na a dagiti saan a sumurot iti daytoy ket mamulta iti dua ribo a pisos iti first offense, tallo a ribo a pisos ken pannakasuspeno ti operasyon, ken ti maikatlo ken sumarsaruno pay a panaglabsing ket agmulta iti lima a ribo a pisos ken ma-revoke ti permit na.
Dinakamat pay ti konsehal a para kadagiti baro nga mangestablisar a paggasolinaan ditoy cudad ket nasken nga adda ti Review and Assessment ti Planning ken Development Officer ditoy ciudad ken makikoordenar iti BFP, CENRO, Engineering Office, City Health Office, BPLO, ken dadduma a pangopisinaan.
Malaksid iti daytoy ket mangisayangkat pay ti public hearing babaen ti quadcom a bukbuklen ti committees on Trade and Industry, Law, Enrvironment and Public Health and Sanitation ken dagitoy ti mangipaay ti pinal a desisyon no mapalubosan ti panakaestablisar dagiti baro a paggasolinaan.
Kabayatanna, inbatad ni Fariñas a dagiti agdama nga agop-operaren a fuel station ket saanen a sakopen iti zoning requirement wenno ti distansiya ngem kasapulan nga adda ti upgrade iti safety system da pakairamanan ti pannakaikabil ti firewall.
Ti nasao a gakat ket naipasa iti maikadia a pannakaibasa kabayatan ti regular session.
