LAOAG CITY – Naibutaktak iti budget hearing ti Department of Health (DOH) iti Senado a karaman iti kwestionable a pannakaipasdek ti health facility ti Department of Health (DOH) ti construction firm dagiti Discaya.
Iti panagsaludsod ni Health Committee Chairman Risa Hontiveros ket dinakamat ni Health Secretary Ted Herbosa ti St. Timothy Construction Corporation dagiti Discaya a karaman iti non-operational wenno walk-away health centers idi 2020.
Inbatadna a naammoan daytoy a banag kalpasan nga inruar ni Presidente Ferdinand Marcos Jr. ti Top 15 contractors a karaman kadagiti maanomalya a flood control projects.
Inlawlawag ni Herbosa a dagiti walk-away nga health facilities ket aramid dagiti contractors a nangabak iti bidding, innalana ti bayad ngem saanna met nga inlippas ti proyekto rason a saan daytoy a mausar.
Atapen ni Senador Bam Aquino nga arig ghost project daytoy ngem inlawlawag ni Herbosa nga idekdeklarar a delayed dagiti projects ken insigidada nga i-terminate ti kontrata ken ti nabatbati iti proyekto a saan a nalpas ket ibirukan manen ti baro a contractor tapno lippasen.
Kuna ni Herbosa a 30% dagiti delayed constructions ken daytoy ket basol dagiti contractor.
Innayonna a saan a kayat nga awaten dagiti contractors dagiti proyekto para iti health facilities gapu ta daytoy ket “naimpis,” kayatna a saoen ket naigetda iti pannakaipasdek kadagiti pasilidadda gapu ta dawdawatanda nga umuna dagiti contractor ti detalyado nga architectural ken engineering designs para iti panagpalisensia ti pasilidad.
